|
|
kainga � mihi � whakamarama
kainga � mihi � whakamarama |
|
HE AHA TE RARURARU?
He mahi whai hua tenei, he mahi kore hua ranei - te whakarereke i nga ira?
HE aha to pirangi? He tomato tapawha - e mama ake ai te whakatakoto ki roto pouaka? He aporo e kore e pirau - ka noho ki te Toa mo te wa tino roa? Pewhea tetahi panana - engari ko te rongo ki te waha, me he pititi? He moemoea enei? He korero pea no nga X-Files?
Ehara! Kei te heke te werawera o etahi Kaiputaiao kia penei rawa nga huarakau me nga huawhenua. E ai ki nga korero, ko te putake o enei mahi, he oranga tangata. Ki ta nga Kamupene Nui, ara, penei me Monsanto, ma enei tu momo mahi ka whakakorea te matekai me te noho kore-rawa o nga whenua pohara o te Ao, penei me India, me Ethiopia me era atu whenua. Ko te tikanga o tenei korero, ka taea e nga kamupene nei ki te waihanga i nga momo huawhenua ka ahei te whakatipu ki nga wahi pakapaka, ki nga whenua korekore. Ka matatoru te whakatipu, ka taea te hauhake, ka whai oranga nga iwi pohara nei.
Ki ta te hunga kore-whakaae, ko te putake ke, he whakaki i nga pukoro o nga tangata whai rawa, na ratou hoki nga Kamupene nui o te Ao! Kaore enei tangata penei me Greenpeace i te whakapono ka toro atu te ringa manaaki o te hunga whai rawa na. Ki o ratou na whakaaro, he tangata matapiko ke ratou. Apiti atu ki tena, e mea ana ratou, me tupato. Kaore e tika ma te tangata e whakaraweke i nga taketake a huawhenua, a huarakau, a kararehe, a tangata ranei. Kaore i te mohiotia, he aha te hua ka puta mai a nga ra kei te heke mai? Tena pea, ka whanau mai he mamae tino kaha rawa atu i enei mahi - kaore e taea te rongoa te whakatau, te whakamutu, te patu ranei. Na reira, inaia tonu nei, kei te whakapau kaha nga tangata mohio ki te putaiao me te hangarau ki te whakaraweke, ki te tini i nga taketake--tangata, a-huawhenua, a-huarakau, a-kararehe hoki. Engari, he mahi whai wariu, he kaupapa whai tikanga enei? He kaupapa putaiao enei, he kaupapa mahi moni ranei? Mau e whiriwhiri!
|
kainga � mihi � whakamarama � Ka noho tapu tenei, he taonga na Te Aka Matua, 1999 |